სტუ-ს ნიკო მუსხელიშვილის სახელობის გამოთვლითი მათემატიკის ინსტიტუტის დირექტორს, მეცნიერსა და პედაგოგს, პროფესორ ვახტანგ კვარაცხელიას, 2022 წლის 30 სექტემბერს გადაეცა საქართველოს ტექნიკური უნივერსიტეტის პრესტიჟული ჯილდო – “ოქროს მედალი”, რომელიც ეძლევა გამორჩეულ თანამშრომლებს “საქართველოს ტექნიკური უნივერსიტეტის წინაშე გაწეული განსაკუთრებული დამსახურებისთვის”.

ფიზიკა-მათემატიკის მეცნიერებათა დოქტორი, პროფესორი ვახტანგ კვარაცხელია თითქმის 15 წელია ხელმძღვანელობს სტუ-ს ერთ-ერთ მნიშვნელოვან კვლევით დაწესებულებას – ნიკო მუსხელიშვილის სახელობის გამოთვლითი მათემატიკის ინსტიტუტს. ამ ხნის განმავლობაში, მიუხედავად ამ ძალზე საპასუხისმგებლო და შრომატევადი ადმინისტრაციული საქმიანობისა, იგი ყოველთვის ახერხებდა ქმედითი მონაწილეობა მიეღო საქართველოს ტექნიკური უნივერსიტეტისათვის მაღალკვალიფიციური კადრების აღზრდაში, ყოფილიყო პროდუქტიული და წარმატებული მეცნიერი, რასაც მოწმობს აღნიშნულ პერიოდში მის მიერ გამოქვეყნებული სამეცნიერო სტატიები მაღალრეიტინგულ ჟურნალებში და მონაწილეობა არაერთ საერთაშორისო კონფერენციაში ორგანიზატორისა თუ მიწვეული მომხსენებლის სტატუსით, მისი ხელმძღვანელობით მომზადებული სამაგისტრო და სადოქტორო ნაშრომები.

ვულოცავთ ბატონ ვახტანგს ამ დამსახურებულ აღიარებას და მაღალ ჯილდოს.

სტუ-ს ნიკო მუსხელიშვილის სახელობის გამოთვლითი მათემატიკის ინსტიტუტი