საქართველოს ტექნიკური უნივერსიტეტის აკადემიურმა საბჭომ და სენატმა განიხილეს და დაამტკიცეს “საქართველოს ტექნიკური უნივერსიტეტის ნიკო მუსხელიშვილის სახელობის გამოთვლითი მათემატიკის ინსტიტუტის სამეცნიერო პერსონალის სამსახურში მიღების წესში“ ცვლილებები, რომელიც 2020 წლის 28 დეკემბერს მიიღო ინსტიტუტის სამეცნიერო საბჭომ. ვაქვეყნებთ ინსტიტუტის სამეცნიერო საბჭოს აღნიშნული სხდომის ოქმიდან ამონაწერს.
ამონაწერი
საქართველოს ტექნიკური უნივერსიტეტის
ნიკო მუსხელიშვილის სახელობის გამოთვლითი მათემატიკის ინსტიტუტის
სამეცნიერო საბჭოს სხდომა
ოქმი №27
28 დეკემბერი, 2020 წელი
სხდომას ესწრებოდნენ საბჭოს წევრები: ჰ. მელაძე (საბჭოს თავმჯდომარე), მ. მენთეშაშვილი (თავმჯდომარის მოადგილე), გ. გიორგობიანი, დ. ზარნაძე, მ. ზაქრაძე, ვ. კვარაცხელია, მ. კუბლაშვილი, ბ. მამფორია, ვ. ტარიელაძე, გ. ცერცვაძე, პ. წერეთელი.
სხდომის მდივანი – ინსტიტუტის სწავლული მდივანი ზ. სანიკიძე.
დღის წესრიგის პუნქტი:
2. სამეცნიერო თანამდებობებზე არჩევნებისას საკონკურსო მოთხოვნების შესახებ.
მ ო ი ს მ ი ნ ე ს
ინსტიტუტის დირექტორმა, ვ. კვარაცხელიამ საბჭოს წევრებს მოახსენა “სსიპ საქართველოს ტექნიკური უნივერსიტეტის ნიკო მუსხელიშვილის სახელობის გამოთვლითი მათემატიკის ინსტიტუტის სამეცნიერო პერსონალის სამსახურში მიღების წესში“ გარკვეული ცვლილებების შეტანის მიზანშეწონილობის თაობაზე. მან ყურადღება გაამახვილა იმ გარემოებაზე, რომ აღნიშნულ დოკუმენტში, კონკურსანტის მიმართ წაყენებული მოთხოვნებიდან ზოგიერთი ატარებს საკმარისად ზოგად ხასიათს, სახელდობრ, საკვალიფიკაციო მოთხოვნებში თითქმის არ ფიგურირებს კონკურსანტის სამეცნიერო აქტივობის ხარისხობრივი და რაოდენობრივი მაჩვენებლები.
ამასთან დაკავშირებით, ვ. კვარაცხელიამ საბჭოს წევრებს შეახსენა, რომ სამეცნიერო ჟურნალის და, შესაბამისად, მასში გამოქვეყნებული ნაშრომის რეიტინგს დღეისათვის განსაზღვრავს მისი ინდექსაცია მსოფლიო სამეცნიერო საზოგადოების მიერ აღიარებულ ინტერნეტ ბაზებში. ასეთ მასშტაბურ და მაღალი რანგის ბაზას წარმოადგენს Web of Science, რომლის საძიებო სისტემაში ინდექსირებული ჟურნალების პრესტიჟულობას და მაღალრეიტინგულობას განაპირობებს სათანადო რიცხვითი მახასიათებელი (იმპაქტ-ფაქტორი). მნიშვნელობით მეორე ბაზად სამეცნიერო სივრცეში ითვლება რეფერატიულ-ბიბლიოგრაფიული სისტემა Scopus, სადაც ასევე მაღალი რეიტინგის მქონე ჟურნალებია თავმოყრილი.
ვ. კვარაცხელიამ ხაზი გაუსვა იმ ვითარებას, რომ თანამედროვე მკვლევარის სამეცნიერო მოღვაწეობა დღესდღეობით ძირითადად ფასდება სწორედ ამ ბაზებში განთავსებული პუბლიკაციების მიხედვით და წარმოუდგენელია ისეთი დიდი ტრადიციების მქონე მაღალკვალიფიციურ მეცნიერულ დაწესებულებაში, როგორიცაა ჩვენი ინსტიტუტი, რომელიმე სამეცნიერო ვაკანსიაზე განხილული იქნას პრეტენდენტი, რომლის ნაშრომები ან საერთოდ არ მოიპოვება ან ნაკლებად იძებნება აღნიშნულ ბაზებში. შესაბამისად, აღნიშნა მან, აუცილებლად მიმაჩნია ეს მდგომარეობა არსებულზე უფრო მკაფიოდ იქნას ასახული ინსტიტუტის ზემოთ მოყვანილი საარჩევნო-ნორმატიული აქტით განსაზღვრულ მოთხოვნებში და კარგი იქნება, თუ საბჭო იმსჯელებს ამ საკითხზე.
ა ზ რ ი გ ა მ ო თ ქ ვ ე ს
საბჭოს ყველა წევრმა ერთხმად აღნიშნა საკითხის აქტუალობა და დაეთანხმა ინსტიტუტის დირექტორის წინადადებას “სსიპ საქართველოს ტექნიკური უნივერსიტეტის ნიკო მუსხელიშვილის სახელობის გამოთვლითი მათემატიკის ინსტიტუტის სამეცნიერო პერსონალის სამსახურში მიღების წესში“ გარკვეული ცვლილებების შეტანის საკითხის განხილვის აუცილებლობის თაობაზე.
აზრთა გაცვლა-გამოცვლისას გამოიკვეთა რამდენიმე მოსაზრება სამეცნიერო პუბლიკაციების ხარისხობრივი და რაოდენობრივი მაჩვენებლების დადგენის მიმართულებით. აღნიშნულ შეხედულებათა საბოლოო შეჯერებისას საბოლოოდ განისაზღვრა ინსტიტუტის საარჩევნო წესში შესატანი ცვლილებები (დადგენილებაში ცვლილებები მუქი ფერის კურსივითაა გამოყოფილი).
დ ა ა დ გ ი ნ ე ს
1. “სსიპ საქართველოს ტექნიკური უნივერსიტეტის ნიკო მუსხელიშვილის სახელობის გამოთვლითი მათემატიკის ინსტიტუტის სამეცნიერო პერსონალის სამსახურში მიღების წესის“ მე-2 მუხლის მე-2, მე-3 და მე-4 პუნქტები ჩამოყალიბდეს შემდეგი რედაქციით:
“2. მთავარი მეცნიერი თანამშრომლის თანამდებობის დაკავება შეუძლია პირს, რომელსაც აქვს დოქტორის ან მასთან გათანაბრებული აკადემიური ხარისხი, სამეცნიერო-კვლევითი საქმიანობის არანაკლებ 6 წლის გამოცდილება (რაც გულისხმობს არა მხოლოდ სამეცნიერო-კვლევით, უმაღლეს საგანმანათლებლო ან სხვა პროფილურ დაწესებულებაში სამეცნიერო თანამდებობაზე მუშაობას, არამედ გამოქვეყნებულ სამეცნიერო პუბლიკაციებსაც), ბოლო 5 წლის განმავლობაში გამოქვეყნებული ან გამოსაქვეყნებლად მიღებული სამეცნიერო პუბლიკაციები, მათ შორის არანაკლებ ერთი – იმპაქტ-ფაქტორიან (Web of Science) ჟურნალში, ხოლო დანარჩენი პუბლიკაციებიდან არანაკლებ სამი – Scopus-ში ინდექსირებულ ჟურნალში. პირი მთავარი მეცნიერი თანამშრომლის თანამდებობას იკავებს 5 წლის ვადით ან უვადოდ. უვადოდ თანამდებობის დაკავება შეუძლია პირს, რომელიც აკმაყოფილებს ამ პუნქტით დადგენილ მოთხოვნებს და რომელსაც აქვს განსაკუთრებული სამეცნიერო მიღწევები (მაგალითად, აქვს სამეცნიერო პუბლიკაციები წამყვან ადგილობრივ და საერთაშორისო ჟურნალებსა და სხვა გამოცემებში, მიღებული აქვს მონაწილეობა ეროვნულ და საერთაშორისო სამეცნიერო-კვლევით პროექტებში და სხვა). უვადოდ არჩეული მთავარი მეცნიერი თანამშრომელი 5 წელიწადში ერთხელ ექვემდებარება უნივერსიტეტის წესდებით დადგენილი წესით ატესტაციის გავლას.
3. უფროსი მეცნიერი თანამშრომლის თანამდებობის დაკავება შეუძლია პირს, რომელსაც აქვს დოქტორის ან მასთან გათანაბრებული აკადემიური ხარისხი, ბოლო 5 წლის განმავლობაში გამოქვეყნებული ან გამოსაქვეყნებლად მიღებული სამეცნიერო პუბლიკაციები, მათ შორის არანაკლებ სამი – Scopus-ში ინდექსირებულ ჟურნალში. პირი უფროსი მეცნიერი თანამშრომლის თანამდებობას 5 წლის ვადით იკავებს.
4. მეცნიერი თანამშრომლის თანამდებობის დაკავება შეუძლია პირს, რომელსაც აქვს მაგისტრის ან მასთან გათანაბრებული აკადემიური ხარისხი, ბოლო 5 წლის განმავლობაში გამოქვეყნებული ან გამოსაქვეყნებლად მიღებული სამეცნიერო პუბლიკაციები, მათ შორის არანაკლებ ორი – Scopus-ში ინდექსირებულ ჟურნალში. ეს უკანასკნელი მოთხოვნა პირზე არ ვრცელდება, თუ ის პირველად იღებს მეცნიერ-თანამშრომლის გამოცხადებულ კონკურსში მონაწილეობას. პირი მეცნიერი თანამშრომლის თანამდებობას 5 წლის ვადით იკავებს.“
2. აღნიშნული დადგენილება წარედგინოს საქართველოს ტექნიკური უნივერსიტეტის აკადემიურ საბჭოს განსახილველად.
სამეცნიერო საბჭოს თავმჯდომარე ჰ. მელაძე
საბჭოს მდივანი ზ. სანიკიძე
ოქმიდან ამონაწერის სისწორეს ვადასტურებ ხელმოწერილია ზ. სანიკიძე
სტუ-ს ნიკო მუსხელიშვილის სახელობის
გამოთვლითი მათემატიკის ინსტიტუტის
სწავლული მდივანი
